Chansson do`ill mot son plan e prim

Chansson do`ill mot son plan e prim
Farai puois que botono`ill vim
E l`aussor cim
Son de color
De mainta flore
Verdeia la fuoilla
E`il chan e`il braill
Son a l`ombraill
Dels auzels per la bruoilla.
Pel bruoill aug lo chan e`l refrim
E per q`om no m`en fassa crim
Obre e lim
Motz de valor
Ab art d`amor
Don non ai cor qe`m tuoilla
Ans si be`m faill
La sec a traill
On plus vas mi s`orguoilla.
Val orguoill petit d`amador
Que leu trabucha son seignor
Del luoc aussor
Ius al terraill
Per tal trebaill
Que de ioi lo despuoilla
Dreitz es lagrim
Et ard` a rim
Qi-`ncontr` amor ianguoilla.
Per ianguoill ges no`m vir aillor
Bona dompna, ves cui ador
Mas per paor
Del devinaill
Don iois trassaill
Fatz semblan que no`us vuoilla
C`anc no`ns guazim
De lor noirim
Mal m`es que lor acuoilla.
Si ben m`acuoill tot a esdaill
Mos pessamens lai vos assaill
Q`ieu chant a vaill
Pel ioi qe`ns fim
Lai o`ns partim
Dont sovens l`uoills mi muoilla
D`ir` e de plor
E de doussor
Car per ioi ai qe`m duoilla.
Ges no`m duoill d`amor don badaill
Ni non sec mesura ni taill
Sol m`o egaill
Que anq no vim
Del temps Caym Amador meins acuoilla
Cor trichador
Ni bauzador
Per que mos iois capduoilla.
Bella, qui qe`is destuoilla
Arnautz dreich cor
Lai o`us honor
Car vostre pretz capduoilla.